7 de julio de 2012

CERTAME DE CANTERÍA DE PARGA - AJOUPAMACIÓN DE ARXINAS.

Mañán os arxinas (canteiros) temos xuntanza.

Celébrase a XVIII edición da Feira dos Callos e a Cantería de Parga, no concello de Guitiriz. En realidade a XVII,  xa que o certame de cantería rexurde este ano despois da suspensión do pasado ano - por mor da crise? – que non se celebrou.
Os arxinas chegan á carballeira de Parga sobre as nove da mañán para escoller un cachote de boa pedra de Parga e ás dez comeza o concurso.
Foto: Arxinas muriando (Traduc. :Canteiros traballando).

Para min é unha gozada esas primeiras horas de traballo, nas que desbastamos o bruto da peza, xa que o son da ferramenta manual de 30 arxinas (+/-) enche a carballeira e trasládanos aos tempos nos que este oficio era totalmente tradicional. E non coma nestes tempos nos que estar nun aserradeiro de pedra supón aguantar un ruído insufrible, causado polas máquinas eléctricas.
Segundo avanza a xornada vai chegando o público, que pode seguir a evolución do noso traballo e do resto da programación da feira:  música tradicional, mostra de artesanía, gastronomía, etc,...
Foto: Aquí estou escuriando na arría (Traduc.: picando na pedra).

Foto: David Iglesias Debén, xamarúa arxina da Riela das Mainas.
 (Traduc.: compañeiro canteiro da Terra das Moas).

Finalmente, ás catro da tarde, o xurado valora o noso traballo xa rematado e concedense os premios.
Os arxinas da Terra das Moas (Louriña) deixamos ben alto o noso bo facer dende que asistimos a este certame, xa que, polo menos  ata o de agora, algún de nós sempre resultou premiado.

Foto: Peza da miña autoría premiada nunha edición pasada.


  Foto: Peza de David Iglesias Debén.


                                                   Foto: Peza de Pedro José Rodriguez Álvarez, arxina da parroquia de Atios (Porriño).

As obras premiadas quedan instaladas definitivamente en diferentes espazos públicos do concello.
  
                                              Foto: Peza da miña autoría instalada na subida ao Castelo de Parga.

Tódolos amantes da canteiría temos unha cita mañán en Guitiriz, polo certame e polas boas obras de cantería que dende antigo os arxinas deixaron neste concello.
Foto: Castelo de Parga.
Foto: Pedras con historia formando parte dunha construción máis recente.

Pero sobre todo a pedra en estado natural, como a mín máis me gusta. Aquí temos unha moa con miles de anos de historia que milagreiramente sobreviviu á explotación das canteiras de Parga.

6 comentarios:

  1. Marcos, "mostro": xa me enterei que gañaches o primeiro premio. Parabéns. Moi bonita a peza que fixeches.
    Saúdos,
    Jose.

    ResponderEliminar
    Respuestas
    1. Grazas Jose, alá foi a xuntanza de canteiros en Parga e tiven a sorte de acadar o primeiro premio do concurso. Imaxino que viches a peza aquí http://www.lavozdegalicia.es/lugo/
      ou aquí?
      http://elprogreso.galiciae.com/nova/182729.html

      O xompela (traduc:compañeiro) Juan Vazquez do Porriño levou o terceiro premio, confirmando que a “Terra das Moas” é terra de xidos arxinas (bos canteiros).

      Quero destacar e felicitar o segundo posto de Laura Duve xa que non é habitual a participación de mulleres arxinas.

      Pero a cousa non rematou ahí, tamén tiven a sorte de coñecer un pouco mellor a Manuel Silva Rey, natural de Santalla (Begonte). Se houbese un premio ao mellor arxina, habería que darllo a este home de pedra, sen pelos na lingua e cos batoques ben postos.

      Este si que é un “mostro”, un auténtico canteiro, coma os de antes! Está claro que non fan falta escolas, hai que mamalo oficio nas murias (nas obras).

      Eliminar
  2. Saudos. Noraboa polo premio. O ano pasado pasamos pola zoa facendo a ruta de sendeirismo e vimos algunhas, este ano tamén están espostas en Parga para a súa visita? Pódese pasar este próximo fin de semana. Saudos. Alex

    ResponderEliminar
    Respuestas
    1. Grazas Alex. A verdade é que non sei onde están tódalas pezas e penso que tardan bastante en colocalas. Atoparédelas na carballeira de Parga, na subida ao Castelo e tamén un grupo na outra beira da via do tren, moi cerca do paso a nivel. Tamén teño visto algunha na vila (Guitiriz), o mellor será que preguntedes alí mesmo.
      Que teñades boa andaina e non deixedes de pasar pola pena Xiboi (agradezo unhas boas fotos).

      Eliminar
  3. Hola amigo ,gustame o teu blog e tamén que fales de min,queriache comentar que onde pos Juan Rodriguez é Pedro José Rodriguez Alvarez, el é meu irmàn è o canteiro son eu.
    Saudos Pedro J.

    ResponderEliminar
    Respuestas
    1. Desculpas Pedro, agora mesmo corrixo o dato.
      Oes,... pero eu lembro un ano que carilla de toi tamén xaraba escuriando,... non é?

      axanvo xirio xamarrúa!

      Eliminar